Hórreo de Bustelo

Hórreo de Bustelo - Dodro - San Xoán de Laíño

Imaxe: Beatriz Pereiras

No lugar coñecido como A Eira, no ángulo SE da aldea.

Fermoso exemplar de hórreo mixto, de considerable tamaño, con reloxo de sol e con cuberta de lousas. A cimentación é unha repisa de perpiaños de granito sobre a rocha natural, en parte tapada por espesa vexetación. Os soportes son cinco cepas de perpiaños. Tornarratos corrido ao longo de todo o corpo do hórreo. Ten catro claros, orixinalmente pechados con balaústres de madeira e unha cinta, aínda que actualmente apenas se conserve a madeira. Tería unha porta de madeira no lateral leste, actualmente desaparecida, conservando as dúas columnas de pedra que a enmarcaban. Non ten linteis. Columnas e cornixa de pedra. Penal dianteiro de pedra con porta de madeira, e penal traseiro de perpiaños de granito, sen ventilación. Sobrepenas nos dous pinches, ambos de pedra. Cuberta sen tellas, a base de lousas. Remates: na parte dianteira, cruz céltica (chamada funeral neste lugar), moi frecuente nos hórreos de Bustelo, sobre base cuadrangular e esta sobre pedestal troncopiramidal; e na parte traseira, fermoso remate en forma de torre estilizada cun reloxo de sol circular en pedra acaroado na súa base cuadrangular. Orientado ao NE.

Segundo a ficha do Inventario de Patrimonio, sería de finais do século XIX (entre 1879 e 1880) por analoxías con outros hórreos.

  • INFORMACIÓN
  • Código: DO-HO039
  • Outras denominacións: Hórreo do Señor Ramón
  • Tipoloxía: Hórreos
  • Cronoloxía: Século XIX
  • Concello: Dodro
  • Parroquia: San Xoán de Laíño
  • Lugar: Bustelo
  • Acceso a pé: Bo
  • Galería de imaxes: Acceder
  • Conservación:

    Moi mala, en total estado de abandono, faltándolle practicamente toda a madeira dos claros. O tellado, que é un raro exemplo de cubrición de lousas, único coñecido no concello, está tamén en mal estado.

  • Protección:

    Plan Xeral de Ordenación Municipal do Concello de Dodro

    Inventario Xeral do Patrimonio Cultural de Galicia

    Rexistro de Bens de Interese Cultural (BIC)

    Decreto 449/1973, de 22 de febrero, por el que se colocan bajo la protección del Estado los «hórreos» o «cabazos» antiguos existentes en Asturias y Galicia

  • Referencias:

    Traballo de inventariado feito por Beatriz Pereiras en 2010 (Nº 202)

    Reloxos de sol de Galicia

  • COLABORA

  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo

Hórreo de Vigo

Hórreo de Rialiño

Hórreo de Castro

Eira da Lavandeira de Imo (11 hórreos)