Transporte funicular aéreo da Cerámica de Campaña

Transporte funicular aéreo da Cerámica de Campaña - Valga - Santa Cristina de Campaña

Imaxe: Laura de Charo · Fotografía

No 1927 a Cerámica de Campaña (Novo y Sierrra) construía un moderno sistema Bleichert funicular de trasporte aéreo para a arxila que se extraía da Mina Mercedes, así como os materiais cerámicos que se producían na factoría, até o Embarcadoiro de Caneiras de carga e descarga no río Ulla.

As boas condicións de transporte son esenciais nunha industria que produce unha mercadoría voluminosa e pesada, polo que as cerámicas localízanse sempre en lugares que, ademais de próximos ás barreiras das que obteñen as arxilas, estean nas inmediacións dunha estación ferroviaria ou onde poda construírse un embarcadoiro para empregar a vía marítima. A fábrica de Campaña, ademais de contar en Pontecesures co embarcadoiro e coa estación do ferrocarril de Santiago a Pontevedra, en 1927 vai construír un embarcadoiro e esta liña de transporte aéreo de vagonetas de algo máis de oitocentos metros até a fábrica, para non ter que carretar o ladrillo e a arxila os case tres quilómetros que a separan de Pontecesures.

Existe un proxecto, desde todos os puntos de vista moi pretensioso, para a instalación dun embarcadoiro para o amarre de catamaráns turísticos e a construción (que non rehabilitación!) dun "teleférico" co obxectivo de ofrecer unha “vista aérea” da zona. Curioso tamén, ademais de que o orzamento de execución sexa duns catro millóns de euros, que se prenteda solicitar a declaración de BIC (Ben de Interese Cultural), para despois transformar estes elementos do patrimonio industrial nun "teleférico". Segundo o Comité Internacional para a Conservación do Patrimonio Industrial pertencente á ICOMOS, o patrimonio industrial "debe protexerse completamente e non se debe permitir ningunha intervención que comprometa a súa integridade histórica ou a autenticidade da súa armazón".

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Barreira do Monte Leveiró

Mina Porto Piñeiro

Barreira das Gándaras do Forno

Telleira da Torre