Capela dos Desamparados

Capela situada no centro do lugar de Brión, inserida no muro de peche do Pazo dos Torrado de Brión, do que formaba parte. Foi fundada por Diego Manuel Torrado en 1783 con motivo da súa coxeira, que o impedía asistir aos actos relixiosos na Igrexa de Santa María de Leiro. Acceso desde a rúa mediante unha pequena escalinata de pedra. Construción de planta rectangular de pequenas dimensións coa sancristía acaroada á fachada norte, resolta con muros de cachotería e cantería con cuberta a dúas augas de tella. Fachada sinxela coroada por unha cruz sen imaxes e un pequeno oco de iluminación. Portada alintelada con inscrición e escudo central da familia.