Igrexa de Santa Baia do Araño

Igrexa de Santa Baia do Araño - Rianxo - Santa Baia do Araño

Imaxe: José Alberto Solla Barreiro

A igrexa parroquial do Araño, datada no século XVII, consta dunha soa nave de planta rectangular dividida en catro treitos, por tres arcos faixóns de medio punto apoiados sobre pilastras. O último treito corresponde ao presbiterio, lixeiramente máis estreito e máis baixo. Unha liña de imposta marca o comezo da bóveda de canón que cobre toda a nave. Antes da ábsida aparecen dous pequenos altares laterais incrustados no muro, nun oco formado por un arco de medio punto. Nos pés da nave atópase a tribuna á que se accede a través dunha escaleira incrustada no muro.

No exterior o volume é case prismático, xa que o altar apenas destaca, tan só a sancristía engadida na cabeceira do mesmo, cunha menor altura e muros de cachotaría. As súas dimensións máximas son de 11,45 por 31,60 metros. A fachada principal carece de adornos. A porta ten un arco de medio punto, e sobre esta un oco cadrado de iluminación. No lateral dereito da fachada aparece a torre-campanario, de planta cadrada e dividida en tres corpos; o inferior non presenta decoración, tan só a porta de acceso. O último treito está formado por unha cúpula sobre un tambor de sección octogonal.

A igrexa consérvase en bo estado, cunha recente restauración da cuberta. Nos anos 30 do século pasado foi substituída a tribuna orixinal de madeira pola actual de albanelería. Está rodeada polo cemiterio, formado por nichos de xeito graduado para salvar o desnivel do terreo.

  • INFORMACIÓN
  • Código: RI-AR001
  • Outras denominacións:
  • Tipoloxía: Arquitectura relixiosa
  • Cronoloxía: Século XVII
  • Concello: Rianxo
  • Parroquia: Santa Baia do Araño
  • Lugar: Traba
  • Acceso a pé: Bo
  • Galería de imaxes: Acceder
  • Conservación:

    -

  • Protección:

    Plan Xeral de Ordenación Municipal do Concello de Rianxo (A-001)

    Inventario Xeral do Patrimonio Cultural de Galicia

  • Referencias:

    Plan Xeral de Ordenación Municipal do Concello de Rianxo - Aprobación inicial de maio 2014

    Mateo Vázquez Ares

  • COLABORA

  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo

Igrexa de Santa Comba de Rianxo

Capela de San Xoán Bautista de Vista Real

Capela dos Milagres

Ermida de Santa Lucía