Restos de barcos areeiros

Restos de barcos areeiros - Rianxo - Santa María de Isorna

Imaxe: Javier Figueroa Iglesias

Na década dos anos sesenta e setenta, e incluso nos oitenta, era habitual ver navegar o leito do río Ulla por grandes barcazas cargadas de area. Era unha actividade emerxente que naceu baixo o paraugas da construción, pois as obras, tanto públicas como privadas, comezaban a alorar por todos os municipios da comarca e Galicia. Foi unha actividade moi importante e que deu de comer a moitas persoas.

A area era o material máis utilizado e tamén o máis barato. Estaba ao alcance de case todos nos ríos. Só había que poñer os medios necesarios para sacala e poñela á venda.

Mariñeiros e veciños de Isorna, foron os pioneiros en explotar este recurso. Reconverteron barcazas e incluso crearon melloras nos sistemas de extracción e facer máis fácil esta actividade. En Isorna aínda se poden apreciar restos dunha actividade que deu de comer a máis de cincocentas persoas da zona. Barcos abandonados e grúas oxidadas son testemuñas dunha economía que tiña como principal nexo de unión o leito do río Ulla.

Co paso dos anos, a situación foi cambiando e mellorando. Os empresarios puxeron culleres a bordo e comezaron a instalar as coñecidas chuponas, uns aparatos que succionaban os áridos e en quince minutos cargaban a cuberta. Os puntos de venda fóronse instalando ao longo do río na parte de Rianxo e chegou a haber até catro lugares distintos. Outro porto de referencia foi o de Pontecesures, onde os empresarios de Isorna tamén foron pioneiros.

Houbo épocas nas que até uns vinte barcos percorrían o Ulla cada día co prezado material, e daba traballo a preto de cen persoas entre as que ían a bordo e as que estaban en terra, sen contar aos transportistas que percorrían toda Galicia co material procedente do río.

O negocio ía vento en popa até que chegou a época dos anos 80. A actividade marisqueira non era todo o boa que os mariñeiros querían. A produción ía a menos e entón as miradas dirixíanse cara as naves que se dedicaban a remover os fondos dos ríos e extraer áridos. As mobilizacións dos mariscadores comezaron en Carril. Pouco a pouco a súas queixas foron a máis e as mobilizacións chegaron até os políticos que coa presión exercida, apostaron por eliminar unha actividade moi importante para todo o territorio do Baixo Ulla e da que vivían decenas de familias.

  • INFORMACIÓN
  • Código: RI-AI003
  • Outras denominacións:
  • Tipoloxía: Arquitectura industrial
  • Cronoloxía: -
  • Concello: Rianxo
  • Parroquia: Santa María de Isorna
  • Lugar: O Regueiro
  • Acceso a pé: Bo
  • Galería de imaxes: Acceder
  • Conservación:

    -

  • Protección:

    Non

  • Referencias:

    Areeiros no río Ulla en 1986 | CRTVG

    La Voz de Galicia

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Serradoiro de José Ribeiro

Telleira de Palleiro

Restos de barcos areeiros

Telleira de Quintáns