Hórreo de Vigo

Hórreo de Vigo - Dodro - Santa María de Dodro

Imaxe: Beatriz Pereiras

Pertence á casa nº 23, no núcleo de Vigo, preto da estrada AC-305, no medio dunha finca.

Fermoso exemplar de hórreo mixto con reloxo de sol. Cimentado sobre unha repisa de cachotaría de granito. Os soportes son catro cepas de pedra, molduradas na parte superior e inferior. Os gabinetes, sen pechar, úsanse para gardar a leña. Tornarratos corrido ao longo de todo o corpo do hórreo. Ten tres claros, con balaústres de madeira e dúas cintas, cunha porta de madeira no lateral leste. Non ten linteis. Columnas e cornixa de pedra, esta última moldurada. A cornixa divide o penal do pinche na parte traseira. Penal da fronte de pedra con porta de madeira pintada de verde, e penal traseiro tamén de pedra con oito fendas de ventilación horizontais. Ten sobrepenas nos dous pinches, ambos de pedra. Cubrición de tella do país. Remates: cruz latina alta florenzada e con chafráns, sobre escocia e esta sobre base cuadrangular, na parte dianteira; e reloxo de sol na parte traseira. Fermoso exemplar de reloxo circular sobre base en escocia e esta sobre pedestal cuadrangular. Na parte superior ten un remate tipo “agarradeira”. Conserva o gnomon. O hórreo está orientado ao NE.

É un hórreo antigo, como a casa, vivenda tradicional, do século XIX. No fronte do hórreo pon a data, mais actualmente é ilexible.

  • INFORMACIÓN
  • Código: DO-HO057
  • Outras denominacións:
  • Tipoloxía: Hórreos
  • Cronoloxía: Século XIX
  • Concello: Dodro
  • Parroquia: Santa María de Dodro
  • Lugar: Vigo
  • Acceso a pé: Bo
  • Galería de imaxes: Acceder
  • Conservación:

    Bastante boa, unicamente as madeiras están en peor estado.

  • Protección:

    Plan Xeral de Ordenación Municipal do Concello de Dodro

    Inventario Xeral do Patrimonio Cultural de Galicia

    Rexistro de Bens de Interese Cultural (BIC)

    Decreto 449/1973, de 22 de febrero, por el que se colocan bajo la protección del Estado los «hórreos» o «cabazos» antiguos existentes en Asturias y Galicia

  • Referencias:

    Traballo de inventariado feito por Beatriz Pereiras en 2010 (Nº 59)

    Reloxos de sol de Galicia

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Hórreo de Castro

Hórreo de Pexegueiro

Hórreo de Sar

Hórreo de Vigo