Proxecto Louceiros de Bamio

O Centro Sociocultural de Bamio é a sede do Proxecto Louceiros de Bamio, lugar onde se gardan as mostras da louza recuperada e outros elementos para a interpretación da paisaxe cultural do barro da ría de Arousa e do río Ulla. Trátase dun pequeno núcleo interpretativo sobre a louza de Bamio, xurdido da iniciativa social e do interese das persoas que participan neste proxecto de recuperación da memoria social do barro.

As pezas expostas, achegadas pola veciñanza e colaboradores, van recuperando a súa dignidade colocadas nunha vitrina encargada para esta función, aínda que tamén se meten en canastros diferenciados os anacos chegados dos distintos lugares-fornos e con distintas cronoloxías, coa idea de avanzar co seu estudo. Recibe a visita de colexios, asociacións e familias interesadas polo tema, que percorreron a Ruta do Barro, desde a Praia de Bamio até aquí.