Castro de Cerneira

Castro de Cerneira - Valga - San Salvador de Setecoros

Xacemento castrexo, composto por un recinto central, de forma aproximadamente circular, rodeado por un parapeto ou muralla e foxo exterior. O recinto central conta cunhas dimensións duns 60-65 metros de ancho, en sentido leste-oeste, por unhas medidas semellantes no eixo norte-sur, aínda que na actualidade o límite norte aparece alterado. O parapeto ou muralla térrea que circunda este recinto central consérvase en todo o perímetro, agás no límite setentrional, onde desapareceu debido ás actividades agrícolas. As dimensións deste elemento son considerables: entre 6 e 9 metros de anchura, por uns 3,5-4 metros de altura. Un foxo que segue a mesma liña que o parapeto completa o sistema defensivo, conservándose en toda a metade meridional do xacemento, mentres que na zona noroeste aparece cortado por unha estrada, e na zona norte foi obxecto da mesma destrución causada polas actuacións agrícolas. Na actualidade as dimensións aproximadas deste foxo son duns 10 metros de ancho, por unha profundidade de escasamente 1 metro, xa que probablemente se atope parcialmente colmatado.

Na zona norte do xacemento, onde o peche do recinto central e sistema defensivo foron destruídos para acondicionar o espazo como fincas de cultivo, localizáronse fragmentos cerámicos, datable de modo xenérico ao séculos I-II d.C. e entre os que pode salientarse un pivote de ánfora.

  • INFORMACIÓN
  • Código: VA-AQ012
  • Outras denominacións: O Castro
  • Tipoloxía: Arqueoloxía
  • Cronoloxía: Idade do Ferro
  • Concello: Valga
  • Parroquia: San Salvador de Setecoros
  • Lugar: Cerneira
  • Acceso a pé: Bo
  • Galería de imaxes: Acceder
  • Conservación:

    O acondicionamento da zona norte como unha pequena terraza de cultivos, coa explanación conseguinte, supuxo a destrución do extremo setentrional do recinto central, parapeto e foxo. Os desmontes practicados para a construción de vivendas nesta zona norte, impiden coñecer se o xacemento contaba con terrazas asociadas. A pista actual que dende o núcleo de Cerneira ascende cara as últimas vivendas do pobo, cortou a liña de foxo pola zona oeste-noroeste.

  • Protección:

    PXOM de Ordenación Municipal do Concello de Valga (AR-12: GA36056008)

    Inventario Xeral do Patrimonio Cultural de Galicia

  • Referencias:

    PXOM de Ordenación Municipal do Concello de Valga, aprobado o 15 de outubro do 2010 pola Consellería de Medio Ambiente, Territorio e Infraestruturas

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Túmulo Nº 1 da Pedra do Viño

Castro dos Vilares

Soaviña

Gravados do Monte da Cabreira