Casa de Gran Mean Pinal

Vivenda e edificación auxiliar situadas ao norte do lugar de Abuín, dando fronte á estrada DP-3301. Edificación principal de planta cadrada e dous andares resolta con muros de cantaría de granito e cuberta a catro augas de tella. Composición simétrica das fachadas compostas por seis ocos rectangulares, exceptuando a fachada oeste, que ten acaroada unha edificación auxiliar dun só andar e cuberta a dúas augas de tella. A planta baixa da fachada principal, onde se localiza o acceso, está retranqueada con respecto ao piso superior, apoiado nos muros laterais e en dúas pilastras de granito. Fiestras balconeiras no segundo andar, con balcóns de granito nos extremos con varanda de ferro.