Cruceiro de Carreiras

Cruceiro de Carreiras - Pontecesures - San Xulián de Requeixo

Imaxe: José Alberto Solla Barreiro

Carreiras é un dos lugares máis antigos do municipio. Nun outeiro e no centro dun cruzamento de vellos camiños levántase o cruceiro, que, segundo se desprende dunha das innumerables inscricións esculpidas nel, data de 1747, aínda que podería ser algo anterior. Na construción deste cruceiro investíronse 80 días.

A columna do cruceiro mide aproximadamente 4,50 metros. Até os anos 70 do século XX tiña tamén dúas pequenas cruces a ambos lados do cruceiro principal, de leste a oeste, das que soamente queda a principal. O retablo propiamente dito ten ao poñente a imaxe do Redentor, coa representación da Paixón e a figura de San Antón á súa esquerda. Polo nacente atópase a Raíña dos Anxos, que é a patroa do lugar. A festa na súa honra celébrase o 9 de xaneiro. Nunha das catro escalinatas de estilóbata figura un nome, posiblemente do patrocinador ou construtor do cruceiro. A columna está chea de sinais e frases máis ou menos lexibles, como “S conced 80 días de yn”, para cantos rezasen unha Salva ante o cruceiro. Do capitel, curiosamente traballado con figuras, anxos e símbolos, colgaba antigamente un farol que atendía á veciñanza.

O cruceiro foi pintado e retocado no 1867, posto que daquela frecuente o policromado desta clase de monumentos, “a deboción de Clemente Jamardo”, veciño do lugar.

No ano 2020 realizáronse traballos de restauración no cruceiro, deixando ao descuberto unha característica singular: había restos de policromía nas imaxes, e o máis peculiar: vestixios de ouro nesa pintura. A policromía dourada era habitual na arquitectura e escultura eclesiástica polo poder adquisitivo da Igrexa, mais nos cruceiros é inusual, así que a explicación ten que ver co mecenas que doou a cruz. Arredor da base do cruceiro había unhas xardineiras que se eliminaron. Ao retiralas, os restauradores fixeron outro achado: restos de pavimento enlousado que, probablemente, tamén estará debaixo das capas de formigón que rodean a contorna do cruceiro.

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Cruz Nº 2 de Infesta

Cruceiro de San Lázaro

Cruceiro da rúa Sagasta

Fito Xacobeo