Casa de Borobó

Casa de Borobó - Pontecesures - San Xulián de Requeixo

Na Casa do Río, noutros tempos o almacén familiar da Casa Lozano, viviu o escritor e xornalista Raimundo García Domínguez “Borobó”, quen nacera nunha casa da rúa Portarraxoi o 10 de xullo de 1916. Aínda que o de Borobó é o seu máis coñecido pseudónimo, tamén foi coñecido por outros pseudónimos e heterónimos, entre eles os de Raimundo Lozano, J. Sierra, Ánxel Novo, Xoán Porreás, Tina ou La Piñeira.

Estudou o bacharelato en Pontecesures e despois cursou Filosofía e Letras na Universidade de Santiago de Compostela. Durante a Segunda República ingresou en Izquierda Republicana, mais marchou con Xoán Xesús González para formar Vanguardia de Izquierda Republicana, da que foi secretario de actas. En 1936 a guerra civil española sorprendeuno en Santander, onde asistía á Universidade Internacional de Verán. Foi trasladado a Madrid e participou na defensa da cidade en unidades de artillería e de transporte. Afiliouse á Unión General de Trabajadores, e comezou a súa faceta xornalística, con colaboracións na redacción de Estímulo, voceiro das unidades artilleiras en que participou. Cando xa remataba a guerra afiliouse ao PSOE.

Rematada a guerra, pasou por diversos campos de concentración, tivo que facer o servizo militar en Marrocos e incorporouse á actividade clandestina do seu partido. Fixo de enlace entre os socialistas galegos e a dirección do PSOE en Madrid. Retomou o seu traballo xornalístico participando na publicación Finisterre e, entre 1944 e 1946, en El Español, La Estafeta Literaria, Fantasía e Madrid.

En 1946 volveu a Galicia e incorporouse á redacción de La Noche, do que foi director, e no cal deu cabida a novos escritores que acabarían sendo coñecidos polo alcume de Xeración “La Noche”. Tamén fundou a revista Chan. Posteriormente ocupou a dirección de El Correo Gallego (1960), e máis tarde marchou novamente a Madrid para ocupar altos cargos en diferentes medios de comunicación. Borobó continuou a escribir infatigable, colaborando con publicacións coma Galicia Hoxe ou A Nosa Terra ata a súa morte en 2003 en Trevonzos, unha aldea de Boiro.

  • INFORMACIÓN
  • Código: PO-AC009
  • Outras denominacións: Casa Lozano ou Casa do Río
  • Tipoloxía: Arquitectura civil
  • Cronoloxía: -
  • Concello: Pontecesures
  • Parroquia: San Xulián de Requeixo
  • Lugar: Rúa Víctor García
  • Acceso a pé: Bo
  • Galería de imaxes: Acceder
  • Conservación:

    -

  • Protección:

    Plan Xeral de Ordenación Municipal do Concello de Pontecesures (PO 39)

    Inventario Xeral do Patrimonio Cultural de Galicia

  • Referencias:

    Wikipedia

    Faro de Vigo

    El Correo Gallego

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Estación de Pontecesures

Casa natal de Borobó

Antiga Casa do Concello de Pontecesures

Casa das Cunchas Nº 2 de Redondo