Hórreo Nº 1 da Casa Aguirre

Hórreo Nº 1 da Casa Aguirre - Dodro - San Xoán de Laíño

Imaxe: Beatriz Pereiras

Na horta da Casa de Aguirre, de gran extensión, onde hai un segundo hórreo e dous pombais, ademais dunhas dependencias en ruínas.

A cimentación é unha repisa alta de perpiaños de granito. Os soportes son catro cepas tamén de perpiaños. O tornarratos é unha peza corrida ao longo de todo o corpo do hórreo. Ten tres claros, con balaústres de madeira e unha cinta. Non ten linteis. Columnas e cornixa de pedra. Parece que os dous penais son de pedra, con dez fendas de ventilación verticais e dúas horizontais, cun orificio circular no pinche. Sobrepenas nos dous pinches, ambos de pedra. Cubrición de tella do país. Remates: cruz latina baixa cos extremo ensanchados de sección cuadrangular e ángulos en chafrán, sobre escocia, no pinche norte; e pináculo piramidal sobre base cuadrangular no pinche sur. Orientado ao NE-SW.

A ficha do Inventario de Patrimonio sinala que este hórreo foi construído no ano 1758 (primeiros indicios do cultivo do millo nesta zona). Parece que o ano está documentado nos anais da familia Aguirre. Ademais, os canteiros construtores foron os mesmos que construíron a igrexa parroquial (1754) e a casona dos fidalgos. A familia Aguirre, de orixe vasca, estableceuse en Imo no século XVIII. Posuidores dunha cuantiosa fortuna en terras, enchían os tres hórreos que posuían a base de “medias” ou rendas que percibían na colleita de Teaio, Imo e Castro, ademais da freguesía inmediata de San Xián. Na época que se corresponde en Galicia coa Ilustración e durante o reinado de Carlos III, chegaron a estas latitudes familias completas de vascos que se dedicaron, entre outras cousas, á implantación do millo, que fomentaron enormemente. Para iso, mercaron terras en abundancia que despois arrendaban a labradores necesitados.

  • INFORMACIÓN
  • Código: DO-HO206
  • Outras denominacións:
  • Tipoloxía: Hórreos
  • Cronoloxía: 1758
  • Concello: Dodro
  • Parroquia: San Xoán de Laíño
  • Lugar: Imo
  • Acceso a pé: Bo
  • Galería de imaxes: Acceder
  • Conservación:

    Boa, restaurado polos propietarios.

  • Protección:

    Plan Xeral de Ordenación Municipal do Concello de Dodro

    Inventario Xeral do Patrimonio Cultural de Galicia

    Rexistro de Bens de Interese Cultural (BIC)

    Decreto 449/1973, de 22 de febrero, por el que se colocan bajo la protección del Estado los «hórreos» o «cabazos» antiguos existentes en Asturias y Galicia

  • Referencias:

    Traballo de inventariado feito por Beatriz Pereiras en 2010 (Nº 231)

  • COLABORA

  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo

Hórreo de Castro

Hórreo de Lestrobe

Hórreo de Vigo

Hórreo de Imo