Hórreo de Castro

Hórreo de Castro - Dodro - San Xoán de Laíño

Imaxe: Beatriz Pereiras

No lugar coñecido como a Eira de Abaixo, no ángulo SE do núcleo. Ao pé da estrada.

Fermoso exemplar de hórreo mixto que presenta a particularidade de ter dous arcos de medio punto na repisa. A cimentación é unha repisa de gran altura de perpiaño na parte superior e de cachotes de granito no resto, para salvar o importante desnivel existente. Ten a particularidade de presentar dous vans rematados en arco de medio punto, espazo no que, parece, durmían os cans para impedir que os ladróns roubasen o millo. Non ten soportes, asentando o tornarratos directamente sobre a repisa. O tornarratos é corrido ao longo do corpo de todo o hórreo. Ten cinco claros, con balaústres de madeira e unha e dúas cintas, coas portas de madeira no lado interior do hórreo, o que da a finca (lateral oeste). Non ten linteis. As columnas son de pedra e a cornixa de madeira. Os dous penais son de perpiaños de granito, cubertos de vexetación. Ten sobrepenas nos dous pinches, ambos de pedra. Cubrición de uralita e de tella do país, en moi mal estado. Parece que non conserva os remates, aínda que non se ve pola vexetación. Orientado ao NW-SE.

Segundo a ficha do Inventario de Patrimonio, parece tratarse do hórreo máis antigo de Castro, situándose en anos inmediatamente anteriores a 1860 (en función dos datos históricos dos outros hórreos). É un exemplo único das súas características nesta aldea e, probablemente, de toda a parroquia. Sinalar que nesta Eira de Abaixo, que era privada, había un terceiro hórreo, coñecido como o Hórreo da Ardeira, de madeira, con pés de pedra e tornarratos circulares, do que hoxe tan só quedan unhas pedras dispersas. Parece que o famoso bandoleiro do Araño Xan Quinto atacou este hórreo varias veces. Diante del facíanse as festas de San Roque.

  • INFORMACIÓN
  • Código: DO-HO048
  • Outras denominacións: Hórreo Nº 1 da Eira de Abaixo
  • Tipoloxía: Hórreos
  • Cronoloxía: Século XIX
  • Concello: Dodro
  • Parroquia: San Xoán de Laíño
  • Lugar: Castro
  • Acceso a pé: Bo
  • Galería de imaxes: Acceder
  • Conservación:

    Mala, coa madeira en moi mal estado e a cubrición en estado ruinoso. No extremo Sur hai un claro totalmente arruinado. Cuberto en parte pola vexetación.

  • Protección:

    Plan Xeral de Ordenación Municipal do Concello de Dodro

    Inventario Xeral do Patrimonio Cultural de Galicia

    Rexistro de Bens de Interese Cultural (BIC)

    Decreto 449/1973, de 22 de febrero, por el que se colocan bajo la protección del Estado los «hórreos» o «cabazos» antiguos existentes en Asturias y Galicia

  • Referencias:

    Traballo de inventariado feito por Beatriz Pereiras en 2010 (Nº 216)

  • COLABORA

  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo

Hórreo de Teaio

Hórreo de Revixós

Hórreo de Bexo

Hórreo Nº 2 da Casa Aguirre