Fonte e lavadoiro de Barral

Conxunto de fonte e lavadoiro situados ao sur do lugar de Barral, sobre a beira da estrada principal que o atravesa. Está acaroado a un muro de peche dunha finca, realizado en cachotaría de granito. Fonte de cantaría, composta por un volume prismático inferior onde se sitúa o cano e un volume de remate en arco de medio punto, separados por unha cornixa moldurada. Ten un pequeno mesado semicircular sobre un pé de granito acaroado a un lateral e unha pía rectangular que verte directamente ao lavadoiro. Lavadoiro de planta rectangular de granito, con lousa inclinada de lavar nun lateral.