Casa de Manuel Antonio

Casa de Manuel Antonio - Rianxo - Santa Comba de Rianxo

Imaxe: Casa Museo Manuel Antonio

Edificación do casco histórico de Rianxo. Casa natal de Manuel Antonio, que data do século XIX, situada na rúa de Abaixo.

Construción de planta rectangular e tres andares, realizada con muros de cachotaría de pedra e cantaría nos elementos nobres. Cuberta a dúas augas de tella, que se prolonga sobre o corredor de granito do andar superior, con varanda e montantes de ferro. Fachada de composición simétrica de tres vanos, con acceso desde a rúa a través dun portón de madeira central con arco rebaixado. Ventás das mesmas características nos laterais da planta baixa e fiestras balconeiras nas dúas seguintes, con tres balcóns de ferro no andar intermedio. Fachada traseira a patio interior.

Hoxe é a Casa Museo Manuel Antonio, propiedade do Concello de Rianxo. Esta foi a Casa dos Pérez, familia do poeta Manuel Antonio (1900-1930). Recrea nos seus tres andares unha casa vilega e amosa nos seus andeis a biografía do alcumado Poeta do Mar. Alberga no primeiro andar unha colección de fotos de Rianxo de comezos do século XX feita polo seu curmán, o fotógrafo Pepito Pérez. No segundo recrea unha das habitacións co seu mobiliario e no terceiro andar vense os cadernos de bitácora da súa navegación náutica no Constantino Candeira ou no Gelria. Tamén se pode ollar unha escolma da biblioteca, cos libros e revistas ás que se subscribiu, as cachimbas, a súa relación coas Irmandades da Fala, así como publicacións en diversas revistas literarias. Tamén se pode ver o célebre pacto de sangue co seu compromiso co galego ou o manifesto Os Novos.

  • COLABORA

  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo

Casa do Concello de Rianxo

Casa das Cunchas de Quintáns

Casa Cándido

Casa reitoral de San Salvador de Taragoña