Xacemento romano do Gandarón

Xacemento romano do Gandarón - Valga - San Salvador de Setecoros

Este xacemento foi catalogado a raíz do descubrimento dunha serie de retos materiais detectados durante o control arqueolóxico da construción do gasoduto Valga-Tui. Durante aquela actuación, recuperouse ao longo dunha superficie de pouco máis de 100 metros, un conxunto material composto por 62 fragmentos, dos que a gran maioría (37 anacos) corresponden con cerámica de construción romana, en concreto tegulae. Xunto a este grupo, aparecen tamén 19 fragmentos de cerámica común romana (na súa maior parte vasillas sen decoración), 1 moeda e 3 pezas de granito con superficies pulidas por uso (nun dos casos foi identificado o durminte dun muíño circular de man). Naquel momento o xacemento foi erroneamente adscrito ao Concello de Caldas de Reis.

En inspección realizada para a elaboración do catálogo do PXOM do Concello de Valga, localizáronse restos materiais de adscrición romana e compostos principalmente por anacos de cerámica de construción, sobre todo tegulae. Na zona de localización da cerámica, obsérvase igualmente a proliferación de pezas de granito, de pequeno e mediano tamaño, que ofrecen algunha ou varias das súas caras traballadas, e que poderían formar parte de estruturas pétreas, actualmente non determinadas.

Desgraciadamente, durante as obras do gasoduto, perdeuse unha oportunidade única para coñecer, a través de sondaxes valorativas, a tipoloxía e detalles deste xacemento. A presenza de abundantes restos materiais, tanto de construción como de uso común (cerámicas, muíños ou moedas), e os indicios aportados sobre posibles estruturas murais, levan a pensar nun asentamento da época romana, de tipoloxía aínda por determinar.

  • INFORMACIÓN
  • Código: VA-AQ009
  • Outras denominacións:
  • Tipoloxía: Arqueoloxía
  • Cronoloxía: Época romana
  • Concello: Valga
  • Parroquia: San Salvador de Setecoros
  • Lugar: Cernadas
  • Acceso a pé: Bo
  • Galería de imaxes: Acceder
  • Conservación:

    As obras do gasoduto provocaron a destrución parcial do xacemento, ao verse este cruzado pola pista da obra e a gabia do propio gasoduto. O resto do espazo que ocuparía este asentamento, presenta unha menor alteración, aínda que afectado polas plantacións de piñeiros e a apertura dunha pista forestal.

  • Protección:

    PXOM de Ordenación Municipal do Concello de Valga (AR-09: GA36056017)

    Inventario Xeral do Patrimonio Cultural de Galicia

  • Referencias:

    PXOM de Ordenación Municipal do Concello de Valga, aprobado o 15 de outubro do 2010 pola Consellería de Medio Ambiente, Territorio e Infraestruturas

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Castrove

Castro de Balleas

Mosteiro de San Paio

Túmulo Nº 1 da Pedra do Viño