Campo Maneiro

No Campo Maneiro, a CMVMC O Fieitoso de Taragoña desenvolve os seus proxectos Máis ca leña, O Monte é noso e Fousas ao monte.

Mais ca leña consiste na creación dunha área didáctica en terreos da comunidade de montes, dedicada a dar a coñecer os distintos usos e aproveitamentos que ofrece o monte veciñal, máis alá da simple explotación madeireira, abarcando desde a gandería, a micoloxía, a apicultura, a resiñería e a produción de castaña, ao tempo que se fomenta o uso sociocultural e de lecer. Contémplase o acondicionamento, delimitación e sinalización das zonas cos diferentes usos a través da instalación de paneis informativos. Para amosar o uso de actividade gandeira, adecuarase un inmoble como estabulo de rabaño de cabuxas e realizarase un peche cinexético para delimitar o espazo. O proxecto está dirixido basicamente a escolares de educación infantil, primaria e secundaria. Nas inmediacións da parcela a acondicionar atópase o CEIP Brea Segade. Empregaranse as instalacións do CEIP para explicar aos visitantes os diferentes usos do monte, que se complementará coa visita ao monte.

O monte é noso, mais non no sentido da propiedade. Trátase da responsabilidade de pensar máis aló, nese futuro que inclúe a todas as xeracións que están por vir, e traballar arreo en diversas iniciativas para protexer o entorno e facelo sustentable de xeito que a nosa pegada nel sexa para melloralo e protexelo.

Fousas ao monte é o músculo, a innovación, as gañas, a forza da cidadanía, dos veciños e veciñas, de todas as persoas que queren facer do monte veciñal e da protección do medio ambiente un xeito de entender a súa forma de vivir. Representa un movemento veciñal sen costuras, flexible e dinámico... Unha folla de carballo sacudida polo vento que baixa do Castro Barbudo, sen rumbo a ningures, sen patrón, pero que chega onde quere.