Pozo Bastón
Imaxe: Fervenzas de Galicia
Fervenza que forma un pequeno estanque natural no río Té de gran atractivo natural, fonte de lendas e supersticións. Debido ao seu calado é posible darse un baño. Accédese desde a parroquia de Araño, remontando o río Té desde Buía e pasando pola pequena aldea da Ferrería. Existe unha pista forestal até preto do lugar, continuando despois por roteiros ou pola beira do río. Preto do lugar, remontando o río, atópase un muíño. Máis arriba, onde o río se divide en dous, subindo pola marxe dereita atópase unha vella carballeira
Do Pozo Bastón, cóntase a seguinte lenda. Un mouro achegouse a un mozo do Araño que estaba facendo o servizo militar en África e preguntoulle de onde era. E como lle dixo que do Araño, o mouro preguntoulle se sabía onde quedaba o Pozo Bastón; o mozo díxolle que si, que o sabía, e entón o mouro faloulle así:
— No Pozo Bastón están encantadas tres das miñas fillas. Se me fixeses o favor de ir alí e facer o que eu che diga para desencantalas daríache o que me pedises.
Como o rapaz estivo de acordo en facerlle aquel favor, o mouro explicoulle ben o que tiña que facer cando se achegase ao pozo e deulle tres bolos de pan. Mais, insistiu o mouro, non perdas os bolos, non lle contes nada disto a ninguén, e, sobre todo, tes que chegar con eles alí sen que lles falte farangullo ningún.
Cando o mozo regresou ao Araño, antes de ir ao Pozo Bastón pasou pola casa e pousou os bolos enriba da mesa da cociña. Mais a muller, curiosa, quixo ver o que había naquel envolto, destapou e levou á boca un anaco dun deles.
O mozo moito lle rifou pero xa non había remedio. Colleu cara o Pozo Bastón e ao chegar, tal e como lle dixera o mouro, botou á auga un dos bolos. De contado viu saír da auga unha moza dunha fermosura nunca antes vista por el. Logo tirou o segundo dos bolos e saíu do pozo outra rapaza tan bonita como a primeira.
Faltaba o terceiro dos bolos, o encetado pola muller. Tirouno e viu como pelexaba por saír da auga unha terceira moza, tamén moi fermosa, mais coxa. Moito turrou a moza mais como ela non era quen de saír do pozo por si soa agarrouse ás súas irmás e... volveron as tres para a auga.
E alí estarán aínda, entre os cachóns de auga batida daquela fermosa fervenza que se chama Pozo Bastón.
- INFORMACIÓN
- Código: RI-NA008
- Outras denominacións:
- Tipoloxía: Espazos naturais
- Cronoloxía:
- Concello: Rianxo
- Parroquia: Santa Baia do Araño
- Lugar: A Ferrería
- Acceso a pé: Bo
- Galería de imaxes: Acceder
- Conservación:
-
- Protección:
Plan Xeral de Ordenación Municipal do Concello de Rianxo (N-4)
- Referencias:
- XEOLOCALIZACIÓN
- Coordenadas: 42.724610909627 , -8.7720046554863
-
Como chegar desde ...
- ...a Casa do Concello de A Estrada
- ...a Casa do Concello de Catoira
- ...a Casa do Concello de Dodro
- ...a Casa do Concello de Padrón
- ...a Casa do Concello de Pontecesures
- ...a Casa do Concello de Rianxo
- ...a Casa do Concello de Teo
- ...a Casa do Concello de Valga
- ...a Casa do Concello de Vilagarcía de Arousa
-
- COLABORA
-
Queres colaborar no proxecto? Tes algunha imaxe, comentario ou texto que aportar?
ATOPACHES ALGÚN ERRO?
Se atopaches algún na ficha do elemento ou en calquera funcionalidade do sitio non dubides en notificar a incidencia empregando o formulario de contacto do sitio.