Fábrica de tecidos de Ángel Ramos

Fábrica de tecidos de Ángel Ramos - Padrón - Santiago de Padrón

Imaxe: Sergio Pérez Lobato

Coñecida popularmente como “A de Ramos”, estaba dedicada á fabricación téxtil de lenzos e manteis, estampados, sabas, toallas e roupa da casa en xeral. Foi fundada no ano 1886 polo zamorano Ángel Ramos García. Destacar que o tecido era unha tradición artesanal iniciada en Padrón a finais do século XVIII.

Non se limitaba á comercialización do produto final, senón que antes encargouse do abastecemento do liño fiado aos tecedores. Chegaron a traballar baixo a supervisión da empresa uns 400 tecedores. Na fábrica traballaban moitas mulleres, tanto en produción como nos seus amplos mostradores de venda ao público nos baixos da fábrica. A materia prima procedía fundamentalmente de Riga (Letonia), Inglaterra e tamén da Rioxa. Os vapores desembarcaban o liño en Vilagarcía de Arousa, que despois era transportado en barcazas até o Porto de Cesures. Unha vez confeccionado o lenzo nos talleres familiares, a súa comercialización era realizada pola propia empresa, exportándoos a diferentes puntos do Estado español, e a Cuba, Arxentina e Brasil en barcos de vapor. Nesta primeira etapa a mercadoría consistía maioritariamente en “tegidos de lino labrados y llanos”. O sistema de produción doméstica mantense, cando a finais do século XIX, comece a substitución do liño polo algodón.

No ano 1981 falece o fundador da empresa e queda á fronte da mesma a súa viúva, Pilar Mella,  e dous fillos, Julián e Manuel. O primeiro como encargado de funcións directivas e o segundo da organización técnica. A partir deste momento a sociedade pasou a denominarse Viuda de Ángel Ramos. Máis tarde sucédelle o seu fillo Julián Ramos Mella, un promotor industrial que desexaba converter Padrón na Terrasa de Galicia. Julián apoiou á papeleira, ao clube de fútbol, partidos que non se perdía no Campo do Souto, edificou o edificio do casino e promoveu vivendas sociais para os seu traballadores.

O sistema de produción mantívose practicamente inalterado até os primeiros anos da década de 1930, momento no que a empresa se decanta pola produción fabril moderna coa instalación de teares mecánicos, que desde o primeiro momento funcionaron con enerxía eléctrica. O anos de maior auxe de produción da empresa Viuda de Angel Ramos foron os da guerra civil, cando a fábrica foi militarizada e o traballadores tiveron que traballar en tres quendas para dar satisfacción á grande demanda da zona golpista, nun momento en que Cataluña, a máis importante zona produtora de tecidos de algodón, permanecía fiel ao goberno lexítimo da segunda república.

Superada a posguerra, entre 1950 e a década de 1970, a fábrica mantivo unha elevada produción, favorecida pola política restritiva á importación, ao mesmo tempo que o desarrollismo dos anos sesenta estaba aumentando a capacidade adquisitiva da poboación. Alén dos tecidos de rizo (usados para facer toallas) e os lisos (para as roupas de mesa), tamén se fabrican alfombras, para as que se precisou importar lá. A produción diríxese nestes anos a diferentes mercados galegos, así como a Asturias, Madrid e León. En todo este período non se introduciron innovacións técnicas de importancia no proceso produtivo da fábrica.

Hai que sinalar as dificultades dos anos setenta levarían á fábrica a solicitar acollerse aos beneficios do Restructuración de la Industria Textil Algodonera. A actividade fabril restrinxiuse entre 1970 e 1980, mantendo en actividade soamente 16 teares. A imposibilidade financeira de substituír a maquinaria obsoleta por tecnoloxía moderna, sumado ao elevado custe da materia prima, levaron ao cese total da actividade empresarial en 1995.

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Fábrica de lámpadas Iria

Alfolín do sal

Azucreira de Padrón

Fábrica de tecidos de Ángel Ramos