Casa da Laxareta

Casa grande localizada no núcleo de Coaxe que presenta unha planta en forma de L e dous andares levantados en cantaría de granito. Aparece rodeada por un muro de cachotaría que delimita unha finca de tamaño mediano que acolle no seu interior un hórreo mixto de tres claros. Os seus muros acollen unha serie de vans que seguen un ritmo regular ao longo das súas fachadas.

O elemento máis salientable da vivenda son o soportal e balcón corrido e voado que miran ao patio interior, antesala das estancias privadas, destacando tamén o lagar illado situado á beira do portalón de acceso á casa, que acolleu outras arquitecturas adxectivas da casa: forno, cortes, despensa…