Cine Rañó

Cine Rañó - Catoira - Santa Baia de Oeste

Imaxe: haiqueterghanas.blogspot.com

O edificio, de estilo ecléctico, unicamente conserva a fachada en pé. Levantada en granito de boa calidade, a súa fronte presenta unha serie de ocos regulares organizados en rúas verticais e horizontais: no eixo un conxunto de tres ocos agrupados con protagonismo do central (alintelados no andar primeiro e baixo arco de medio punto arriba), e un par de vans organizados verticalmente nos extremos. Coroa o inmoble un acroterio de deseño simple que sitúa un óculo central no centro da composición. O inmoble co que fai medianeira, reproduce unha parte do deseño da fachada do cinema.

O edificio é obra do arquitecto de Meis Robustiano Fernández Cochón "Tano", sendo inaugurado o 20 de marzo de 1957. Este mesmo arquitecto foi o responsable de facer os proxectos do Cine Malvar en Pontevedra, o Cine Cervantes en Vilagarcía de Arousa, o Cine Colón en Forcarei, o Cine Changüy en Soutelo de Montes, a escalinata da Ermida dos Milagres de Amil (Moraña), o Templo Novo de Marín, o Bar-Salón de Té da Praia Compostela de Vilagarcía de Arousa, os Grupos Escolares de Meis e Portas, o Instituto Provincial de Hixiene, entre outras. Caracteriza a súa obra a busca dunha arquitectura civil en consonancia co rexionalismo galego da época.

O Cine Rañó posuía un aforo de 200 butacas. O seu propietario era don José María Rañó e a primeira película proxectada neste cine foi "El Hijo de la Furia". O encargado de proxectar as cintas esa Suso de Emilio quen, con posterioridade, sería substituído por un familiar seu, O Carrandán. O proxector era da marca Superson e o técnico era un vilagarcián chamado Charlín. As entradas eran vendidas por José Guillán, dona Fina (a dona do propietario) e a súa filla, Elvirita.

Naqueles tempos, xunto co campo de fútbol das Lombas, o cine era unhas das poucas actividades de lecer dos veciños. O Cine Rañó enchíase, sobre todo, polo Nadal e San Xosé. Algunhas anécdotas relacionadas co cine son as seguintes.

- Unha veciña era a primeira vez que entraba nun cine, e estando xa pasando o NODO, e polo tanto estaban a escuras, o seu marido preguntoulle que facía tocando a parede, e ela contestoulle que estaba buscando a pía de auga bendita.

- Noutra ocasión prendeu lume na película, e o mozo que estaba alí de axudante saltou pola ventá para non queimarse.

- Era habitual que houbese caídas da tensión eléctrica e, como consecuencia, a pantalla quedaba sen imaxe e a xente protestaba asubiando.

O 9 de marzo de 1961 a Compañía de Teatro Airiños de Rianxo representou a obra “A fiestra valdeira”, de Rafael Dieste. O cura de Isorna Faustino Rey Romero, que estaba inhabilitado para dar misa, colaborou na posta en escena e recitaba poemas antes da posta en escena. O Delegado de Turismo multounos con mil pesetas por non ter autorización e ao dono do cine pecháronlle o local varios meses. Aínda sen permiso, pese a ter solicitado autorización en Pontevedra ao representante do Goberno Civil, arriscáronse e ofreceron a obra en Catoira. O franquismo foi implacable multándoos.

O cine tivo pouca vida e foi pechado o 20 de maio de 1975, sendo propietario don José María Vázquez, médico de Catoira.

  • INFORMACIÓN
  • Código: CA-AC010
  • Outras denominacións:
  • Tipoloxía: Arquitectura civil
  • Cronoloxía: 1957
  • Concello: Catoira
  • Parroquia: Santa Baia de Oeste
  • Lugar: A Estación
  • Acceso a pé: Bo
  • Galería de imaxes: Acceder
  • Conservación:

    Na actualidade, este edificio está en estado ruinoso. Sería interesante a súa rehabilitación posto que o seu estilo arquitectónico ben merece, ademais de ser unha obra dun arquitecto recoñecido.

  • Protección:

    Plan Xeral de Ordenación Municipal do Concello de Catoira (A_018) - Aprobación inicial de 2012

    Inventario Xeral do Patrimonio Cultural de Galicia

  • Referencias:

    Plan Xeral de Ordenación Municipal do Concello de Catoira - Aprobación inicial de 2012

    Entre lusco e fusco

    La Voz de Galicia

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Finca de Patiño

Hotel Balneario Catoira

Casa reitoral de Santa Baia de Oeste

Casa das Pexegas