Petróglifo Nº 6 dos Campos

Grupo de gravados que se espallan por unha extensa zona das parroquias de Santa María de Leiro e Santa Comba de Rianxo, entre A Pedreira e A Devesa de Rianxiño, estendéndose cara ao noroeste até o curuto do Alto do Corniño. Os gravados máis salientables son:

- Un grupo de gravados non prehistóricos, probablemente feitos polos canteiros que traballaban aquela zona, e nos que se pode ler, entre outras marcas, o topónimo "Rianjo", o que fai pensar que poida ser unha marca da delimitación da parroquia.

- Escena de loita entre dous cabalos (ou cervos en período de caída da cornamenta).

- Unha posible escena de caza na que varios animais parecen fuxir en manda na mesma dirección, mentres outro queda atrás ferido e outros parecen mortos sobre o camiño.

- Outro enorme cervo de características moi similares aos grandes anteriores.

- Posible femia preñada.

- Cervo macho en actitude de bradar.

- Animal con aspecto de felino.

- Na rocha máis setentrional deste conxunto, unha colección de cuadrúpedes, outro felino e outro antropomorfo moi similar ao do Petróglifo Nº 1 do Mouchos.

Este conxunto está formado por seis laxes.

- Laxe 1: formada por dous afloramentos próximos, situados 15 metros ao leste dun valado. Ten tres cuadrúpedes e un dobre círculo incompleto con coviñas.

- Laxe 2: mide 9,80 metros (N-S) e 5,50 metros (L-O). Vense zoomorfos completos e incompletos na parte central da rocha.

- Laxe 3: acaroada á cara oeste do valado. Mide 4,20 metros (N-S) e 3,10 metros (L-O). Debido á erosión e ao lume, só é posible distinguir a besta que mide uns 35 centímetros.

- Laxe 4: situada na cara oeste do valado.

- Laxe 5: están moi deterioradas debido as marcas da maquinaria agrícola, e os gravados son practicamente identificables.

- Laxe 6: mide 3,50 metros (NL-SO) e 1,70 metros (NO-SL). Os motivos consisten en cinco coviñas de entre 6 e 14 centímetros de diámetro.