Hórreo de Bexo

Hórreo de Bexo - Dodro - San Xoán de Laíño

Imaxe: Beatriz Pereiras

Localizado na Aldea de Arriba, na zona coñecida como A Rechenla, ao pé dunha pista asfaltada, xunto á casa nº 2 á que pertence.

A cimentación é unha repisa alta de cachotaría de granito encintada con cemento, a cal salva o desnivel existente, xa que o hórreo localízase nunha costa. Os soportes son catro cepas de pedra, cunha pedra de perpiaño vertical e por riba unha máis pequena horizontal. Os gabinetes están pechados con ladrillo e cemento. Na parte frontal presenta unha escadas de cachotaría de granito con catro grades, algo separadas do hórreo para evitar o acceso ao roedores. Tornarratos corrido ao longo do corpo de todo o hórreo. Ten tres claros, pechados claro e medio con ladrillo e claro e medio con madeira recentemente reformada, con dúas cintas. Os esquinais do hórreo son de pedra, con cinco fendas de ventilación horizontais cada un. Linteis e columnas de pedra, e cornixa de madeira. Na parede costal é visible, nas columnas e nos esquinais, motivos decorativos en relevo a media altura, nos esquinais en forma de media campá e nas columnas en forma cuadrangular cos extremos superior e inferior en semicírculo. Penal frontal de pedra con porta de madeira de feitura recente, e penal traseiro de pedra con doce fendas de ventilación horizontais. Sobrepenas nos dous pinches, ambos de pedra. Armazón de madeira e cubrición de tella do país no claro e medio do oeste e de uralita no claro e medio do leste. Remates: pináculo piramidal estilizado sobre base cuadrangular na cara frontal, mentres que na parte posterior só conserva parte da base cuadrangular. Orientado ao NE. 

No 2010, unha veciña duns setenta e pico anos, xa non lle acorda de facer este hórreo. Di que orixinalmente pertencía a unha familia coñecida como Os Carleses. Parece que tería máis de cen anos. Segundo a ficha do Inventario de Patrimonio, parece de principios do século XX (por analoxía).

  • INFORMACIÓN
  • Código: DO-HO199
  • Outras denominacións: Hórreo de Ramoniña
  • Tipoloxía: Hórreos
  • Cronoloxía: Século XX
  • Concello: Dodro
  • Parroquia: San Xoán de Laíño
  • Lugar: Bexo
  • Acceso a pé: Bo
  • Galería de imaxes: Acceder
  • Conservación:

    Mala, con parte da cubrición de tella en moi mal estado e a introdución de materiais de construción modernos, como son o ladrillo e o cemento para o peche dos gabinetes e dos claros, e a uralita como cubrición da metade do hórreo.

  • Protección:

    Plan Xeral de Ordenación Municipal do Concello de Dodro

    Inventario Xeral do Patrimonio Cultural de Galicia

    Rexistro de Bens de Interese Cultural (BIC)

    Decreto 449/1973, de 22 de febrero, por el que se colocan bajo la protección del Estado los «hórreos» o «cabazos» antiguos existentes en Asturias y Galicia

  • Referencias:

    Traballo de inventariado feito por Beatriz Pereiras en 2010 (Nº 187)

  • COLABORA

  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo

Hórreo de Teaio

Hórreo de Bexo

Hórreo de Manselle

Hórreo de Lestrobe