Eira dos Mouros

Segundo o especialista en toponimia galega, Fernando Cabeza Quiles (Os nomes da terra, topónimos galegos), Setecoros é un topónimo que se pode interpretar como unha composición do numeral "sete" e do substantivo prerromano “cor/coro" (pedra), en alusión ás sete formacións pétreas que rodean a meseta da Eira dos Mouros, situada no cumio do monte que se eleva sobre a parroquia de Setecoros.

Na inspección realizada para elaboración do catálogo do PXOM do Concello de Valga, non se detectou estrutura visible algunha que puidera corresponder a un asentamento castrexo. Así, na parte superior do Monte Fontebecha, que ostenta un contundente domino visual sobre o curso baixo do río Ulla, desembocadura e fondo da Ría de Arousa, apréciase unha zona chaira, aínda que sen identificarse estruturas de peche ou defensa.