Hórreo da Igrexa

Hórreo da Igrexa - Dodro - San Xián de Laíño

Imaxe: Beatriz Pereiras

Situado na mesma finca que o Pombal do Outeiriño, pertencente á casa nº 14 do núcleo. Sitúase ao pé da estrada.

Non ten repisa, as cepas asentan sobre cadanseus bloques de pedra. Os soportes son catro cepas de pedra encintadas con cemento coa cimentación e moldurados no seu extremo superior. O tornarratos é unha peza corrida ao longo do corpo do hórreo. Ten tres claros, con balaústres de madeira e dúas cintas, cunha porta de madeira no lateral leste. Non ten linteis. Columnas de pedra e cornixa de madeira. Penal dianteiro de pedra con porta de madeira e penal traseiro tamén de pedra con sete fendas de ventilación horizontais. Sobrepenas nos dous pinches, ambos de pedra. No pinche frontal (encintado con cemento co penal) parece que estaría inscrita a data de construción, aínda que está practicamente borrado (1824?). Cubrición de tella do país. Os remates non son os orixinais, estando feitos estes en cemento. Parece que tiña orixinariamente unha fermosa cruz, mais desapareceu. Actualmente presenta unha cruz latina alta e estreita de ángulos en chafrán sobre base en escocia e un pináculo piramidal sobre base cuadrangular. Orientado ao NE.

No 2010, di a propietaria, de 79 anos, que ten máis de cen anos, xa que a casa, co hórreo e o pombal, comprouna o seu avó cando veu da Arxentina, e que a súa nai, que morreu con máis de oitenta anos, acórdalle sempre o pombal e o hórreo. Antigamente o hórreo estaba situado uns metros máis ao sur, mais ao facer a actual pista asfaltada tiveron que desprazalo uns metros cara o interior da finca.

  • INFORMACIÓN
  • Código: DO-HO248
  • Outras denominacións:
  • Tipoloxía: Hórreos
  • Cronoloxía: 1824
  • Concello: Dodro
  • Parroquia: San Xián de Laíño
  • Lugar: A Igrexa
  • Acceso a pé: Bo
  • Galería de imaxes: Acceder
  • Conservación:

    Boa, os propietarios cambiáronlle a madeira e a cubrición. Os remates actuais non son os orixinais, son de cemento. Primitivamente tiña unha cruz moi bonita, segundo a propietaria, mais desapareceu cando desmantelaron o hórreo para desprazalo uns metros.

  • Protección:

    Plan Xeral de Ordenación Municipal do Concello de Dodro

    Inventario Xeral do Patrimonio Cultural de Galicia

    Rexistro de Bens de Interese Cultural (BIC)

    Decreto 449/1973, de 22 de febrero, por el que se colocan bajo la protección del Estado los «hórreos» o «cabazos» antiguos existentes en Asturias y Galicia

  • Referencias:

    Traballo de inventariado feito por Beatriz Pereiras en 2010 (Nº 75)

  • COLABORA

  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo

Hórreo de Traxeito

Hórreo de Vigo

Hórreo de Castro

Hórreo de Dodriño