Petróglifo do Pinar do Rei
Imaxe: Megaliticia
Tamén coñecido como Petróglifo das Lombas ou A Pedra dos Nenos, trátase dun dos gravados identificados polo arqueólogo Antonio de la Peña Santos a comezos dos anos 70. Foron declarados Monumento Histórico-Artístico de carácter estatal dentro dunha listaxe de 195 conxuntos de gravados rupestres da provincia de Pontevedra e publicada no Boletín Oficial do Estado o 10 de marzo de 1975, asignándolle o número 40.
Anterior ao traballo de Antonio de la Peña Santos, foi estudado tamén por outros investigadores, como Ramón Sobrino Lorenzo nos anos 50, destacando os calcos e fotos realizados por este último.
É posible que o topónimo do sitio faga referencia a unha antiga parcela dedicada á produción de madeira como acontece con outros lugares nomeados Pinal ou Pinar do Rei, Carballeira Real ou Devesa Real, terreos acoutados para abastecer de madeira á marina de Ferrol no século XVIII. O transporte desta madeira até Ferrol realizábase vía fluvial até o mar e desde alí até o porto ferrolá.
Ramón Sobrino Lorenzo rexistrou con meticulosidade as dúas estacións rupestres que forman este conxunto. Os seus debuxos a lapis e posterior acabado en tinta e as diferentes fotografías realizadas deixan constancia das dimensións de cada motivo, a disposición dos gravados nos diferentes paneis e a distancia entre eles. Por desgraza, só está localizada a primeira estación formada por unha combinación de dobre anel con oito coviñas no interior e cova central da que parte un suco radial (marcando o solsticio de inverno) que ten acaroados varios aneis con coviña central. Ao seu carón figuran outro círculo simple e un anel que bordea un pequeno grupo de catro coviñas.
O segundo panel estaría, segundo sinala Sobrino Lorenzo, a uns 7 metros, formado por unha espiral e varias cazoletas e coviñas.
No ano 2016, desde o Catoira S.D. trataron de volver atopar este petróglifo duns 4.000 anos de antigüidade (Idade do Bronce). Cos traballos de investigación realizados polos xogadores e a grande colaboración do arqueólogo Ángel Acuña, é de novo localizado a 50 metros ao norte do campo de fútbol. Este achado quedou documentado na curtametraxe titulada A pedra dos nen@s, gañadora do premio do público no certame Telearqueoloxía.
- INFORMACIÓN
- Código: CA-AQ012
- Outras denominacións: Petróglifo das Lombas ou A Pedra dos Nenos
- Tipoloxía: Arqueoloxía
- Cronoloxía: Idade do Bronce
- Concello: Catoira
- Parroquia: Santa Baia de Oeste
- Lugar: Corredoira das Lombas
- Acceso a pé: Regular
- Galería de imaxes: Acceder
- Conservación:
Parte da rocha desapareceu debido á actividade dos canteiros. Na actualidade non existen ningunha medida que garanta a súa conservación. Parte dos gravados están cubertos pola vexetación.
- Protección:
Plan Xeral de Ordenación Municipal do Concello de Catoira (X_0012-GA36010012) - Aprobación inicial de 2012
Rexistro de Bens de Interese Cultural (BIC)
Inventario Xeral do Patrimonio Cultural de Galicia
- Referencias:
- XEOLOCALIZACIÓN
- Coordenadas: 42.673819282886 , -8.7182604139815
-
Como chegar desde ...
- ...a Casa do Concello de A Estrada
- ...a Casa do Concello de Catoira
- ...a Casa do Concello de Dodro
- ...a Casa do Concello de Padrón
- ...a Casa do Concello de Pontecesures
- ...a Casa do Concello de Rianxo
- ...a Casa do Concello de Teo
- ...a Casa do Concello de Valga
- ...a Casa do Concello de Vilagarcía de Arousa
-
- COLABORA
-
Queres colaborar no proxecto? Tes algunha imaxe, comentario ou texto que aportar?
ATOPACHES ALGÚN ERRO?
Se atopaches algún na ficha do elemento ou en calquera funcionalidade do sitio non dubides en notificar a incidencia empregando o formulario de contacto do sitio.