Igrexa de Santa Cristina de Campaña

Igrexa de Santa Cristina de Campaña - Valga - Santa Cristina de Campaña

Imaxe: José Antonio Gil Martínez

Figura en varios documentos antigos, como na concesión que Xelmírez fai a favor do Convento de San Martiño Pinario en 1115 (Sanctam Christinam de Campania cum suis adjuntionibus), ou no testamento de 1131 que Odairo Afonso lega a favor do seu presbítero Pedro (Ad Petro, presbytero de Campania). A datación alto-medieval desta igrexa podería ter correspondencia con vestixios soterrados asociados a ela.

No 1115, o bispo Diego Xelmírez confirma a independencia e autoridade de San Martiño Pinario e Santa María da Corticela, o cobramento do terzo do dezmo do Xiro e posesión das igrexas, xunto coas súas rendas, vilas, coutos e vasalos de, entre outras parroquias, da de Santa Cristina de Campaña.

A igrexa parroquial de Campaña está formada por unha única nave sen cruceiro, de planta rectangular. Ábsida prismática e nave lateral de menor altura de época posterior, onde se sitúa a sancristía. A nave principal atópase dividida en tres treitos por dúas parellas de columnas e un arco triunfal de medio punto aberto no muro da nave con aresta vista sen moldura. A fachada conserva a portada románica abocinada de dobre arquivolta tórica e arco semicircular de billetes no exterior. No cemiterio atopamos unha cruz feita dun só bloque granítico e un cruceiro do século XX.

Na década dos noventa do século pasado, durante unha treboada, o antigo campanario situado na parte superior do templo, resultou destruído debido a un lóstrego que caeu sobre as campás do mesmo. O campanario foi reconstruído, situándose o novo separado da igrexa, nunha torre de planta rectangular.

Nunhas reformas ás que foi sometida o templo, ao retirar un retablo que se erguía obre o antigo cabeceiro da ábsida, descubríronse unhas pinturas góticas. Ao estar ocultas, sufriron moita humidade, mais a pesar disto, consérvanse bastante ben. Teñen un gran interese polo tamaño das mesmas e a proporcionalidade das figuras, reflexando fielmente o xeito de traballar os artesáns pictóricos entre os séculos XV-XVI en Galicia. Destaca a pintura da Anunciación, obra moi ben terminada segundo os técnicos, presidida polo Pantocrátor na súa parte superior.

No ano 2010, fíxose entrega dunha reliquia de Santa Cristina de Bolena á parroquia de Campaña, traída desde Italia.

  • INFORMACIÓN
  • Código: VA-AR001
  • Outras denominacións:
  • Tipoloxía: Arquitectura relixiosa
  • Cronoloxía: Século XII
  • Concello: Valga
  • Parroquia: Santa Cristina de Campaña
  • Lugar: A Eirexe
  • Acceso a pé: Bo
  • Galería de imaxes: Acceder
  • Conservación:

    -

  • Protección:

    PXOM de Ordenación Municipal do Concello de Valga (AR-01: GA36056010)

    PXOM de Ordenación Municipal do Concello de Valga (AR-101)

    Inventario Xeral do Patrimonio Cultural de Galicia

  • Referencias:

    PXOM de Ordenación Municipal do Concello de Valga, aprobado o 15 de outubro do 2010 pola Consellería de Medio Ambiente, Territorio e Infraestruturas

    O camiño esquecido

    Val de Valga - Un vistazo al paraíso

  • COLABORA
  • Queres colaborar no proxecto? Tes algunha imaxe, comentario ou texto que aportar?

    Quero colaborar!

Máis elementos do catálogo


Capela da Nosa Señora dos Desamparados

Igrexa de San Salvador de Setecoros

Ermida da Virxe da Saúde

Capela do Pazo da Bouza